390. deildarráðsfundur raunvísindadeildar

390. deildarráðsfundur raunvísindadeildar var haldinn föstudaginn 18. apríl 2008, kl 12:00-13:20, í fundarherbergi Jarðvísindastofnunar á 3. hæð í Öskju.

Mættir voru: Lárus Thorlacius, Guðrún Marteinsdóttir, Rögnvaldur G. Möller, Hafliði P. Gíslason, Ágúst Kvaran, Ólafur S. Andrésson, Ólafur Ingólfsson, Anna Dóra Sæþórsdóttir og Ágústa Guðmundsdóttir fyrir Ingu Þórsdóttur. Fulltrúar nemenda voru Rakel Sæmundsdóttir (Raunveru) og Hlynur Grétarsson (Stigli). Fundarritari var Jón Guðmar Jónsson.

Mál á dagskrá:

1. Fundargerð síðasta fundar.

Samþykkt án athugasemda.

2. Mál til kynningar.

2.1 Háskólafundur.

Deildarforseti skýrði frá helstu málum á dagskrá nýliðins háskólafundar. Helsta mál á dagskrá fundarins var frumvarp til laga um háskóla. Rektor mun fyrir hönd háskólasamfélagsins koma athugasemdum háskólafundar og háskólaráðs við frumvarpið til Menntamálaráðuneytis og Alþingis.

3. Umsóknir í Tækjakaupasjóð háskólaráðs.

Lögð fram tillaga tækjakaupanefndar deildar (Sigurður S. Snorrason, Bjarni Ásgeirsson og Snorri Þorgeir Ingvarsson), ásamt greinargerð, um forgangsröðun umsókna.

Tillaga tækjakaupanefndar samþykkt einróma.

Jafnframt samþykkti deildarráð einróma eftirfarandi bókun:

„Deildarráð raunvísindadeildar lýsir furðu sinni á lágum fjárveitingum Háskóla Íslands til Tækjakaupasjóðs. Framlög til sjóðsins eru einungis brot af því sem þarf til að sinna verklegri kennslu á viðeigandi hátt. Engir möguleikar eru til ytri fjármögnunar kennslutækja.

Fjárveitingar til kaupa á kennslutækjum eru í hrópandi ósamræmi við fjárfestingar í rannsóknarbúnaði, sem oft þarf að nýta á óæskilegan hátt til grunnkennslu í grunnnámi“.

4. Sjúkra- og upptökupróf í júní.

Deildarráð samþykkir einróma að sjúkra- og upptökupróf vormisserisprófa raunvísindadeildar verði í júní í stað ágúst eins og verið hefur hingað til. Líklegir dagar eru 18., 19, eða 20. júní. Líklegast verður 19. júní aðalprófdagur fyrir sjúkra- og upptökupróf í raunvísindadeild.

5. Sendinefnd efnafræðinga frá Kína.

Ágúst Kvaran formaður efnafræðiskorar skýrði frá því að sendinefnd efnafræðinga frá Kína væri í Evrópuheimsókn í sumar og óskaði eftir að hitta fulltrúa efnafræðinnar við Háskóla Íslands í þeirri heimsókn hér á landi.

Áætluð koma kínversku efnafræðinganna er 1. júlí.

Skipuleggja þarf dagskrá og hverjir koma til með að taka á móti Kínverjunum. Ágúst mun kanna innan efnafræðiskorar hverjir eru tilbúnir til að taka á móti þeim á þessum tíma.

6. Rannsóknarsetur í kerfislíffræði.

Formaður líffræðiskorar, Ólafur S. Andrésson, gerði grein fyrir drögum að samningi milli verkfræðideildar, raunvísindadeildar og læknadeildar um „Rannsóknarsetur í kerfislíffræði“ Samningurinn er til fimm ára en fyrir mitt ár 2010 munu samningsaðilar taka afstöðu til þess hvort og þá hvernig samstarfi um rannsóknarsetrið verður fram haldið.

Fleira ekki tekið fyrir á fundi.

Fundi slitið kl 13:20

Jón Guðmar Jónsson

fundarritari.