384. deildarráðsfundur raunvísindadeildar

384. deildarráðsfundur raunvísindadeildar var haldinn fimmtudaginn 10. janúar 2008, kl 13:30-17:30, í Tæknigarði, litla fundarherbergi .

Mættir voru: Lárus Thorlacius, Rögnvaldur G. Möller, Hafliði P. Gíslason, Ágúst Kvaran, Ólafur S. Andrésson, Áslaug Geirsdóttir, fráfarandi skorarformaður og Ólafur Ingólfsson, nýtekinn við sem skorformaður, Anna Dóra Sæþórsdóttir, nýtekin við sem skorarformaður og Inga Þórsdóttir. Fulltrúar nemenda voru þau Rakel Sæmundsdóttir (Raunveru) og Hlynur Grétarsson (Stigli). Fundarritari var Jón Guðmar Jónsson.

Fjármálanefnd deildar, þeir Sigurður S. Snorrason og Ragnar Sigurðsson mættu á fundinn undir dagskrárlið; „2. Fjárhagsáætlun deildar fyrir árið 2008“.

Mál á dagskrá:

1. Fundargerð síðasta fundar.

Samþykkt án athugasemda.

2. Fjárhagsáætlun deildar fyrir árið 2008.

Deildarforseti skýrði frá og fór yfir þá vinnu sem hefur verið í gangi undanfarnar vikur við endurskoðun þeirri fjárhagsáætlunar deildar sem send var til fjármálanefndar háskólaráðs í október síðastliðnum, með halla upp á 48,5 Mkr.

Endurskoðunin og breyttar forsendur hafa leitt til þess að bráðabirgðaniðurstaða nú er á milli 15-17 Mkr afgangur. Í þessu sambandi er ein aðalforsendan sú að miðað er við ekki verði greitt fyrir leiðbeiningu framhaldsnema fyrr en árið eftir að nemandinn brautskráist.

Núverandi fyrirkomulag er þannig að helmingur af vinnu vegna leiðbeiningar er greiddur á fyrsta heila ári nemandans og seinni helmingur í uppgjöri ársins sem nemandinn brautskráist.

Við endurskoðun fjárhagsáætlunar hefur einnig verið farið yfir hvert námskeið í öllum skorum, meðal annars með það í huga að hagræða í framboði námskeiða þar sem möguleiki er á slíku.

Helstu sparnaðarráðstafanir í þeirri fjárhagsáætlun, sem nú er verið að leggja lokahönd á, til viðbótar þeim ráðstöfunum sem var gert ráð fyrir í áætluninni sem lá fyrir í október síðastliðnum eru:

a) Greiðslum/gjaldfærslu vegna leiðbeiningar framhaldsnema er alfarið frestað þar til árið eftir að nemandinn brautskráist.

b) Hætt verði að veita kennsluafslátt (greiða fyrir) frá og með 1. janúar 2008 vegna stofustjórnunar við Raunvísindastofnun.

c) Þá var lögð fyrir fundinn svohljóðandi tillaga frá formanni líffræðiskorar, Ólafi S. Andréssyni:

„Umsjónarkennurum námskeiða ber að fylgja samþykktri fjárhagsáætlun skorar og deildar, og á það sérstaklega við um vinnustundaáætlun einstakra námskeiða. Ekki verða greiddar fleiri vinnustundir en fjárhagsáætlun kveður á um nema með samþykki skorarformanns og deildarforseta“.

Þá hefur einnig verið dregið úr kennslu í mörgum námskeiðum.

Niðurstöður fjárhagsáætlunar og forsendur hennar voru ræddar ítarlega. Óskaði deildarforseti eftir því að deildarráð greiddi atkvæði um helstu viðbótarforsendur við þær, sem áætlunin í október byggði á, og núverandi áætlunin byggir á, sbr. tl. a, b og c hér að ofan. Voru nú greidd atkvæði um tillögurnar:

a) Frestun greiðslna vegna leiðbeiningar þar til árið eftir að nemandi brautskráist var samþykkt þannig:

Já/samþykkir voru 7

Nei/á móti var 1

Sátu hjá, voru 2 fulltrúar nemenda.

Formaður matvæla- og næringarfræðiskorar, Inga Þórsdóttir, óskaði eftir því að það yrði bókað að hún gerði athugasemdir við það og væri á móti því að greiðslur vegna leiðbeiningar yrðu inntar af hendi eftir á og vildi að deildin héldi sig við núverandi fyrirkomulag greiðslna.

b) Hætt verði að veita kennsluafslátt/greiða fyrir fyrir stofustjórn á Raunvísindastofnun frá og með 1. janúar 2008.

Breytingartillaga kom frá formanni eðlisfræðiskorar, Hafliða P. Gíslasyni. Nefndi hann að þar sem greitt hefði verið af deild fyrir stofustjórn í áratugi, þá legði hann til að því yrði ekki hætt með þessum hætti, þann 1. janúar 2008, þar sem tillagan kæmi fram með engum fyrirvara, og þar að auki yrði breytt skipulag í deild frá og með miðju ári 2008.

Var samþykkt samhljóða að kennsluafsláttur vegna stofustjórnar yrði ekki felldur niður frá og með 1. janúar 2008.

Upphaflega tillagan var nú lögð fram með þeirri breytingu að í stað þess að niðurfelling kennsluafsláttar vegna stofustjórnar yrði frá og með 1. janúar 2008, þá yrði það frá og með 1. júlí 2008.

Var það samþykkt samljóða með 7 atkvæðum, 3 sátu hjá þar af 2 fulltrúar nemenda.

c) Tillaga formanns líffræðiskorar um að umsjónarkennurum námskeiða bæri að fylgja samþykktri fjárhagsáætlun hvað varðaði tímafjölda í námskeiðum ofl. var borin undir atkvæði:

Já/samþykkir voru 8

Nei/á móti var enginn

Sátu hjá, voru 2 fulltrúar stúdenta.

Þá gerði skrifstofustjóri grein fyrir bráðabirgðafjárhagsstöðu deildar fyrir árið 2007, miðað við stöðu í bókhaldi, þann 4. jan. 2008 að viðbættum þeim tekjum og gjöldum sem eru í „pípunum“.

Gera má ráð fyrir afgangi (fjárhagsáætlun gerði ráð fyri 4,8 Mkr halla) vegna ársins 2007, ef viðbót fæst við fjárveitingu ársins 2007 að fjárhæð 7-8Mkr vegna leiðréttingar á rannsóknarlíkani deildar, en vilyrði hefur fengist fyrir þessari leiðréttingu hjá formanni fjármálanefndar háskólaráðs.

Formaður stærðfræðiskorar, Rögnvaldur G. Möller, sagðist, f.h. stærðfræðiskorar, gera athugasemdir við það og væri andvígur því að rannsóknarstig væru notuð sem eitt af viðmiðum við skiptingu rannsóknarfjárveitingar ársins 2008 eins og gert er ráð fyrir í endurskoðaðri fjárhagsáætlun.

Formaður efnafræðiskorar, Ágúst Kvaran, vildi að lokum þakka deildarforseta, skrifstofustjóra og fjármálanefnd deildar mikla vinnu og vönduð vinnubrögð við endurskoðun fjárhagsáætlunar í samráði við skorarformenn.

3. Flutningur kennara frá eðlisfræðiskor, þeirra Magnúsar Tuma Guðmundssonar og Páls Einarssonar og frá efnafræðiskor, Jóns Ólafssonar, til jarðvísindaskorar.

Samþykkt einróma flutningur þeirra Magnúsar Tuma Guðmundssonar og Páls Einarssonar úr eðlisfræðiskor og Jóns Ólafssonar úr efnafræðiskor í jarðvísindaskor.

4. Fræðasvið verkfræði og raunvísinda-Staða mála.

Deildarforseti gerði grein fyrir stöðu mála og kvaðst, aðspurður, gera ráð fyrir því að tillögur starfshóps verkfræði- og raunvísindadeilda til rektors um skipulag fræðasviðsins verði hægt að kynna fljótlega í deild.

Fyrir fundinum lá að gefa deildum raunvísinda á hinu nýja fræðasviði verkfræði og raunvísinda nafn.

Margar hugmyndir komu fram og voru mikið ræddar. Að lokum var eftirfarandi tillaga um heiti deildanna á íslensku og ensku lögð fram:

Íslenska:Enska:

Raunvísindadeild; Physical Sciences

Líf- og umhverfisvísindadeild; Life and Environmental Sciences

Jarðvísindadeild; Earth Sciences

Samþykkir nöfnunum voru 5, á móti var 1 og 3, þar af 2 fulltrúar stúdenta sátu hjá.

Þá var rætt um og gert ráð fyrir því að fræðasvið heiti „School“ á enskunni og deild heiti „Faculty“.

Einnig ræddu fundarmenn um og kom fram hjá meiri hluta þeirra að gera mætti ráð fyrir því að fræðasvið verkfræði og raunvísinda heiti „School of Science and Engineering “ á ensku.

5. Önnur mál.

5.1 Verkefnisstjóri deildar/skora með aðstöðu í Öskju.

Formaður land-& ferðamálafræðiskorar, Anna Dóra Sæþórsdóttir, lagði áherslu á að sem fyrst yrði ráðið í starf verkefnisstjóra deildar/skora í Öskju í stað Elínar Ágústu.

5.2 Nemendamál.

Fráfarandi formaður jarðvísindaskorar, Áslaug Geirsdóttir, lagði til, í samræmi við samþykkt skorar, að nemandi við skorina fengi að fara í próf í Almennri efnafræði 1(09.31.10) í 4. sinn nú í janúar, svo að hann geti brautskrást í febrúar næstkomandi.

Samþykkt einróma.

Fleira ekki tekið fyrir á fundi.

Fundi slitið kl 17:30

Jón Guðmar Jónsson fundarritari.