370. deildarráðsfundur raunvísindadeildar

370. deildarráðsfundur raunvísindadeildar var haldinn föstudaginn 30. mars 2007, í VR-II, fundarherbergi VR-257 og hófst kl. 12:30.

Mættir voru:Hörður Filippusson, Þóra Ellen Þórhallsdóttir, Robert J. Magnus, Lárus Thorlacius fyrir Magnús Tuma Guðmundsson, Ágúst Kvaran, Guðni Á Alfreðsson, Ingibjörg Jónsdóttir og Sigurjón Arason fyrir Ingu Þórsdóttur. Fundarritari var Jón Guðmar Jónsson. Viðar Guðmundsson mætti undir dagskrárlið 2.

Mál á dagskrá:

1. Fundargerð síðasta fundar.

Samþykkt án athugasemda.

2. Frá rannsóknanámsnefnd. Drög að reglum raunvísindadeildar um meistara- og doktorsnám.

Viðar Guðmundsson mætti í stað Ágústu Guðmundsdóttur formanns nefndarinnar sem var veik.

Viðar gerði grein fyrir vinnu nefndarinnar að reglum um framhaldsnámið. Ekki væri um neinar strúktúrbreytingar að ræða heldur væri verið að skilja á milli reglna um meistaranámið annars vegar og doktorsnámið hins vegar og þá sérstaklega með það í huga að greina á milli meistaravarna og doktorsvarna.

Miklar umræður urðu um reglurnar sem lágu fyrir fundinum. Meðal annars var bent á að gera þyrfti strúktúrbreytingar á reglunum. Stóra spurningin væri hvort ekki ætti að bjóða upp á almennt meistaranám með 30e ritgerðarverkefni. Jafna þyrfti aðstöðu erlendra nemenda til að sækja um. Rætt var um umsóknareyðublaðið fyrir meistara- og doktorsnámið, því þyrfti að breyta og almennar leiðbeiningar um framhaldsnámið þyrftu að vera til staðar á deildarskrifstofu. Þá kom fram að ekki væri ætlast til að meistarafyrirlesturinn væri „minidoktorsvörn“ Fram kom að ekki væri tekið fram í reglunum hverjir sætu í meistaranámsnefndum eða doktorsnámsnefndum. Bent var á mikilvægi þess að upplýsa nemendur tímanlega um það hvaða framhaldsnámskeið væru í boði og að þau skiptust á bæði misseri. Ekki síður á haustin en vorin en dæmi væri um öll valnámskeið sem væru í boði væru kennd á vormisseri. Margt fleira var rætt.

Samþykkt var að vísa málinu aftur til rannsóknanámsnefndar sérstaklega með tilliti þessa að komið yrði á almennu meistaranámi við deildina þar sem tekið yrði viðmið af reglum deildar um meistara- og doktorsnám. Jafnframt þyrfti að gæta þess að reglurnar samrýmdust reglum um „Miðstöð framhaldsnáms við Háskóla Íslands“ sem verið væri að vinna að.

3. Tillaga stærðfræðiskorar um heimild til að ráða kennara í 50% starf kennara í tölfræði en 50% starfsins yrði við Landbúnaðarháskólann Íslands.

Formaður stærðfræðiskorar lagði fram greinargerð með málinu.

Samþykkt var einróma að að fara fram á það við fjármálanefnd háskólaráðs að ráða í 50% starf tölfræðings í samvinnu við Landbúnaðarháskóla Íslands.

4. Mál afgreitt milli funda: Tillaga líffræðiskorar og samþykkt deildarráðs um ráðningu lektors í þróunarfræði.

Samþykkt var á síðasta deildarráðsfundi að óska eftir því að ráðið yrði í 100% starf lektors í þróunarfræði til 3ja ára. Sjá forsendur ráðningar í bókun þess fundar.

Í framhaldi af samþykkt deildarráðs sendi deildarforseti erindi til fjármálanefndar háskólaráðs með beiðni um að heimilað yrði að ráða í starfið. Fjármálanefnd háskólaráðs samþykkti erindið.

5. Minnkun halla fjárhagsáætlunar deildar fyrir yfirstandandi ár. Staða mála.

Deildarforseti skýrði frá stöðu mála og skorarformenn einnig varðandi sínar skorir um möguleika á frekari niðurskurði í fjárhagsáætlun yfirstandandi árs. Helstu möguleikar felast í því að skera niður einstaka valnámskeið og fresta fyrirhuguðum ráðningum um einhverja mánuði.

6. Nemendakerfi-Skráning þreyttra eininga.

Deildarforseti minnti á orðsendingu sem hann framsendi frá skrifstofustjóra Nemendaskrár vegna þreyttra eininga, sem ekki hafa skilað sér til Nemendaskrár, vegna verkefna nemenda sem þeir voru skráðir í á haustmisseri 2006 en námsframvinda hefur ekki skilað sér í formi þreyttra eininga.

7. Valnámskeið fyrir nema í lýðheilsuvísindum.

Deildarforseti skýrði frá því að erindi hefði borist frá nýstofnaðri námsbraut í lýðheilsuvísindum við Háskóla Íslands sem allar deildir standa að. Erindinu fylgdi listi með tillögum að valnámskeiðum, í öðrum deildum og skorum en námsbrautinni sjálfri, fyrir meistara- og doktorsnema í lýðheilsuvísindum.

Skorarformenn eru beðnir um að kanna hvort það séu fleiri námskeið í raunvísindadeild og námsbraut í umhverfis- og auðlindafræðum en þau sjö, sem koma fram á listanum, sem rétt/eðlilegt sé að bjóða upp á frá raunvísindadeild.

8. Önnur mál.

8.1 Formaður og varaformaður eðlisfræðiskorar.

Hafliði P. Gíslason hefur verið kosinn formaður eðlisfræðiskorar og Viðar Guðmundsson varaformaður til tveggja ára frá og með 1. júlí 2007.

8.2 Afmælisrit Sigmundar Guðbjarnasonar prófessors emeritus.

Deildarforseti minnti á og sagði menn geta skráð sig á tabula gratulatoria í afmælisriti í tilefni af 75 ára afmæli Sigmundar Guðbjarnasonar.

8.3 Háskóli unga fólksins.

Erindi hefur borist frá Guðrúnu Hrefnu Guðmundsdóttur vegna Háskóla unga fólksins þann 11.-15. júní næstkomandi. Þar er óskað eftir því að kennarar og sérfræðingar verði hvattir til að koma með hugmyndir, efni og aðferðir fyrir skólastarfið.

8.4 Tillaga að reglum um val fulltrúa stúdenta á deildarfundi og skorarfundum.

Tillaga hefur borist frá fulltrúum nemenda um fjölda nemenda í deildarráði og á deildarfundum. Gert er ráð fyrir tveimur nemendum frá Raunveru á deildarráðsfundum og fimmtán nemendum á deildarfundum. Samkvæmt tillögum nemenda er gert ráð fyrir því að fulltrúarnir skiptist þannig:

Deildarráðsfundur:

Tveir nemendur kjörnir á aðalfundi Raunveru sitja í deildarráði.

Deildarfundur:

Stúdentar eiga 15 fulltrúa á deildarfundum. Þeir eru kjörnir á aðalfundi nemendafélaga.

• Stigull (félag stærð- og eðlisfræðinema): 3 fulltrúar (þar af einn fulltrúi framhaldsnema)
• Hvarf (félag efna- og lífefnafræðinema): 2 fulltrúar
• Komplex (félag framhaldsnema í efna- og lífefnafræði): 1 fulltrúi
• Haxi (félag líffræðinema): 2 fulltrúar
• Felix: 1 fulltrúi
• Fjallið (félag jarð-, land- og ferðamálafræðinema): 3 fulltrúar
• Folda: 1 fulltrúi
• Hnallþóra (félag matvælafræðinema): 2 fulltrúar (þar af einn fulltrúi framhaldsnema)

Varðandi skorarfundi samþykkti deildarráð að fjöldi fulltrúa framhaldsnema á skorarfundum, sem skorir ákvæðu, yrði viðbót við núverandi fjölda fulltrúa nemenda í grunnnámi.

Fleira ekki tekið fyrir á fundi.

Fundi slitið kl 15:15

Jón Guðmar Jónsson fundarritari