358. deildarráðsfundur raunvísindadeildar

358. deildarráðsfundur raunvísindadeildar var haldinn miðvikudaginn 15. júní 2006, í VR-II, fundarherbergi 257, og hófst kl. 12:30.

Mættir voru: Hörður Filippusson, Robert J. Magnus, Magnús Tumi Guðmundsson, Jón Ólafsson fyrir Ingvar Helga Árnason, Guðmundur Hrafn Guðmundsson, Áslaug Geirsdóttir og Kristberg Kristbergsson. Fulltrúar stúdenta þau, Jón Steinar Garðarsson Mýrdal og Ragnhildur Einarsdóttir. Fundarritari var Jón Guðmar Jónsson. 
Mál á dagskrá:

1. Fundargerð síðasta fundar.

Samþykkt án athugasemda.

2. Ráðning kennara við stærðfræðiskor.

Stærðfræðiskor samþykkti á fundi sínum þann 14. júní síðastliðinn að fá að fara fram á að Rögnvaldur G. Möller verði ráðinn í starf dósents við stærðfræðiskor sem auglýst var 2. október 2005. Lagt er til að ráðið verði í starfið ótímabundið frá 1. júlí 2006.

Rökstuðningur stærðfræðiskorar fyrir tillögu sinni er þessi: „Samþykkt stærðfræðiskorar 14. 6. 06. Stærðfræðiskor fer fram á að Rögnvaldur G. Möller verði ráðinn í starf dósents við stærðfræðiskor sem auglýst var 2. október 2005.  Lagt er til að ráðið verði í starfið ótímabundið frá 1. júlí 2006.

Rökstuðningur:  Á fundunum 4. og 9. maí setti stærðfræðiskor fram skammlista yfir þá umsækjendur sem skorin taldi hæfasta og sem komu helst til að gagnast skorinni best.  Þeir voru Vassili Kolokoltsov, Frank Proske, Einar Steingrímsson, Rögnvaldur G. Möller, Freyja Hreinsdóttir,  Stefán Freyr Hafstein, Mostafa Bendahmane og Tim Hoffmann.  Þeim var boðið í viðtal og til að halda fyrirlestur. Af þeim hættu fimm við fyrir viðtalið vegna þess að þeir höfðu þegar þegið ráðningu annars staðar.  Viðtöl fóru fram við Rögnvald, Hoffmann og Sigurð. Sigurður hefur nú þegið starf annars staðar. Af þeim tveimur sem eftir eru á skammlistanum stendur Rögnvaldur áberandi fremst. Hoffmann er hæfur stærðfræðingur með 6 ára reynslu. Rögnvaldur hefur 16 ára reynslu af kennslu og rannsóknum og hefur staðið sig frábærlega á báðum sviðum.  Hann hefur "international reputation" á sínu sviði.“

Deildarráð gerir ekki athugasemdir við samþykkt skorar um ráðningu Rögnvalds G. Möller í starfið.

3. Nemendaerindi.

3.1 Nemandi í líffræðiskor.

Formaður líffræðiskorar gerði grein fyrir erindinu:
Nemandi í líffræðiskor sem fallið hefur þrisvar sinnum í Efnagreiningu hefur óskað eftir því að fá að sleppa því að taka próf í námskeiðinu þar sem það er ekki lengur í skyldu eða kjarna frá og með yfirstandandi skólaári en nemendur í líffræði brautskrást ekki lengur af brautum.
Deildarráð samþykkti tillögu skorarformanns einróma með fyrirvara um samþykki skorar en málið verður lagt fyrir skorarmenn í tölvupóstsafgreiðslu í dag eða á morgun en málið snýst einnig um það hvort nemandinn geti brautskrást nú í júní.

3.2 Nemandi í efnafræðiskor.

Formaður efnafræðiskorar gerði grein fyrir erindi nemandans. Nemandinn hefur fallið þrisvar sinnum í námskeiðinu Efnagreiningartækni og fer fram á að fá að taka það í fjórða sinn. Efnafræðiskor samþykkti erindi nemandans með 12 samhljóða atkvæðum í tölvupóstsafgreiðslu.
Deildarráð samþykkti tillögu skorar einróma.

4. Nýtt starf lektors í ferðamálafræði.

Formaður jarð- og landfræðiskorar lagði fram greinargerð skorar með ósk um að fjármálanefnd raunvísindadeildar og eftir atvikum fjármálanefnd háskólaráðs kanni hvort skorin geti fjárhagslega bætt við sig og ráðið í 100% starf lektors í ferðamálafræði með áherslu á umhverfismál og náttúrutengda ferðamennsku. Gert yrði ráð fyrir því að jarð- og landfræðiskor kostaði 50% starfsins (44% kennslu og 6% stjórnun) og Ferðamálasetur Íslands 50%.

Umræða varð um málið.

Deildarforseti lagði til að:
a) Fjármálanefnd deildar kanni fjárhagslegar forsendur.
b) Kannað verði hjá Ferðamálasetri hvaða skilyrði myndu fylgja rannsóknarfjármunum frá setrinu.

Var það samþykkt.

5. Nefndir deildar.

Deildarforseti lagði fram yfirlit yfir núverandi nefndir deildar og framtíðarnefndir deildar og drög að erindisbréfi eða hlutverki nefndanna. Rætt var um drögin og hlutverk nefndanna og gerðar athugasemdir. Meðal annars var rætt hve margir fulltrúar verði í einstökum nefndum og hvaðan þeir komi.

Vísinda- og tækjakaupanefnd mun heita Tækjakaupanefnd og forgangsraðar tækjakaupaumsóknum til kennslu. Í nefndinni verða þrír einstaklingar skipaðir af deildarforseta til þriggja ára.

Vísindanefnd sem í verða níu einstaklingar, sex frá deild/skorum og þrír frá stofnunum deildar. Nefndin mun sjá um rannsóknaþing þegar ártalið er jöfn tala og fyrirlestraröðina „Undur veraldar þegar ártalið er oddatala.“

Deildarforseti mun senda deildarráði endurskoðað yfirlit yfir nefndir deildar og skipan þeirra.

6. Önnur mál.

6.1 Fulbrightstyrkir.

Deildarforseti minnti á Fulbrightstyrkina og að skorarformenn kynni málið/styrkina í skor.

6.2 Lokaritgerðir í Þjóðarbókhlöðu.

Lokaritgerðir verða fluttar úr VR-II í Þjóðarbókhlöðu, 3. hæð, vegna breytinga í bókasafni í VR-II.

6.3 Doktorsvarnir í júní.

Deildarforseti minnti á tvær doktorsvarnir þann 16. og 23. júní næstkomandi.

6.4 Starf verkefnisstjóra á deildarskrirstofu.

Níu umsóknir bárust um starf verkefnisstjóra hjá raunvísindadeild á deildarskrifstofu.

Fleira ekki tekið fyrir á fundi.
Fundi slitið kl 14:30
Jón Guðmar Jónsson, fundarritari