1. Fundargerð síðasta fundar

Samþykkt án athugasemda.

2. Dómnefnd um framgang Snæbjarnar Jónssonar í starf dósents í líffræðiskor

Líffræðiskor leggur til að Ólafur S. Andrésson, prófessor í líffræðiskor, verði formaður dómnefndar.

Deildarráð samþykkti að leggja til við rektor að Ólafur S. Andrésson verði formaður dómnefndar.

3. Tillaga rannsóknarnámsnefndar um breytingar á reglum um rannsóknanám

Lagt fram erindi frá rannsóknanámsnefnd, dags. 3. maí 2005, „Um kröfur til samsetningar doktorsnáms og einnig tillögur um breytingar á 5. gr. og 6. gr. reglna deildar um rannsóknarnám.“

4. Umboð og auglýsing um kennarastarf í umhverfis- og auðlindafræðum

Erindið var kynnt í tölvupósti en það felur í sér umboð til námsstjórnar í umhverfis- og auðlindafræðum til að auglýsa starf kennara í umhverfis- og auðlindafræðum. Samþykkt af hálfu deildarráðs að heimila, f.h. raunvísindadeildar, að auglýsa kennarastarf í umhverfis- og auðlindafræðum.

Nánar tiltekið fólst umboð raunvísindadeildar til námsstjórnar í umhverfis- og auðlindafræðum í eftirfarandi, sjá erindi Sigurðar S. Snorrasonar, formanns námsstjórnar í umhverfis- og auðlindafræðum.

„Erindi mitt (Sigurðar S. Snorrasonar, innskot undirritaðs), er að óska umboðs frá ykkur til handa námsstjórn í umhverfis- og auðlindafræðum til þess að hafa umsýslu með þeim áföngum ráðningarferlisins, sem venjulega snúa að skorum og deildum, þ.e.a.s.

• skilgreiningu starfsins,
• samskiptum við fjárreiðu- og rannsóknasvið,
• gerð auglýsingar,
• beiðni til rektors um að hefja ráðningarferlið og um að skipa dómnefnd,
• viðtöku dómnefndarálits frá rektor og fyrstu umfjöllun um dómnefndarálitið, þ.á m. kosningu um umsækjendur,
• senda rektor niðurstöðu umfjöllunar sinnar og úrslit kosninga um umsækjendur með ósk um ráðningu.“

5. Diploma Supplement

Kynnt sýnishorn af Diploma Supplement eða Viðauka við prófskírteini sem Kennslusvið, Gísli Fannberg hafði gert sýnishorn af og deildarforseti hafði einnig aðlagað fyrir efnafræðina.

Skorarformenn þurfa að skila inn Diploma Supplement nú þegar til skrifstofustjóra en það þarf að fylgja prófskírteinum kandídata nú í vor.

6. Breytingar á fjárhagsáætlun skora vegna skráninga í námskeið á haustmisseri 2005 (sjá lið 6.5 í fundargerð síðasta fundar)

Allar skorir eru með sín mál í endurskoðun hvað verkefna- og fjárhagsáætlun ársins/haustsins 2005 snertir m.t.t. skráninga í námskeið á haustmisseri. Stærðfræðiskor gerir litlar breytingar á haustmisseri, eðlisfræðiskor er með sín námskeið í skoðun, efnafræðiskor; fjölgun í námskeiðum 3. árs nema, líffræðiskor; verður tekið fyrir á næsta skorarfundi, jarð- og landfræðiskor; fækkun um 2-3 námskeið og 1 námskeið fer yfir á vor 2006, matvæla- og næringarfræðiskor; 1 viðbótarnámskeið sem þarf að kenna með 8 nemendum.

7. Mál til kynningar

7.1 Afgreiðsla umsókna um framhaldsnám

Lagt fram bréf rannsóknanámsnefndar, dags. 2. maí 2005, um afgreiðslu á umsóknum um rannsóknanám. Umsagnir og afgreiðsla nefndarinnar var svohljóðandi:

02.05. 2005 Inga Þórsdóttir

Fylgiskjal 1
Umsóknir um að hefja rannsóknarnám við raunvísindadeild haustið 2005. Afgreiðsla rannsóknarnámsnefndar

Samtals hafa nefndinni borist 51 umsókn, þar af 9 um doktorsnám (þar af ein um breytingu á tilhögun náms úr MS-námi í dr. nám), 39 um MS-nám, 2 um M.Paed. nám í stærðfræði og ein um M.Paed nám í jarðfræði.

Haldnir voru þrír fundir á vormisseri, og voru langflestar umsóknir afgreiddar á fyrsta (20. maí) og öðrum (22. maí) fundi nefndarinnar.

• Nefndin samþykkti umsóknir 18 stúdenta um MS-nám (15) og dr. nám (3) sem þegar hafa útskrifast með viðeigandi prófgráðu og einkunn, þar af voru 6 umsóknir samþykktar með fyrirvara um breytingar á námskeiðsáætlun.
• Tuttugu umsóknir stúdenta um MS-nám (16) og dr. nám (4) sem áætla að ljúka B.S-prófi (16) eða MS-prófi (4 stúdentar) í vor voru samþykktar með hefðbundnum fyrirvara um námslok og einkunn, þar af voru 3 umsóknir samþykktar með fyrirvara um breytingar á námskeiðsáætlun.
• Umsóknir tveggja stúdenta um M. Paed nám í stærðfræði voru samþykktar, önnur með hefðbundnum fyrirvara um námslok og einkunn.
• Breyting á námstilhögun tveggja stúdenta voru samþykktar, önnur með fyrirvara.
• Tveimur umsóknum var hafnað á grundvelli ónógs undirbúnings og aðstöðu eða því að kröfu um lágmarkseinkunn var ekki fullnægt og var stúdent bent á að hefja framhaldsnám með 4. árs námi.“

„Óafgreiddar umsóknir eru sex og bíða úrlausna. Einn umsækjandi dró umsókn sína til baka.“

Sjá nánar bréf, dags. 2. maí 2005, með nöfnum nemenda og afgreiðsla á umsóknum þeirra, svo og yfirlitsskjal með sömu dagsetningu, nöfnum nemenda og afgreiðslu á umsóknum þeirra. Umsóknir um rannsóknanám við raunvísindadeild H-05/vinnuplagg. Unnið skv. Reglum um rannsóknanám við raunvísindadeild H.Í.

7.2 Hvatningarverðlaun Rannsóknaráðs

Deildarforseti skýrði frá því að nú í morgun á Ársfundi Rannsóknaráðs, hefði Freysteinn Sigmundsson jarðeðlisfræðingur á Raunvísindastofnun, Jarðvísindastofnun, fengið hvatningarverðlaun Rannsóknaráðs.

7.3 Samningur um rannsóknastofu í næringarfræði

Deildarforseti dreifði og kynnti „Samning um rannsóknastofu í næringarfræði, dags. 13. maí 2005, undirritaður af rektor H.Í., Páli Skúlasyni og forstjóra Landspítala-háskólasjúkrahúss, Magnúsi Péturssyni en samningurinn er milli þessara stofnana.

Í 1. gr. samningsins segir: „Rannsóknastofa í næringarfræði er vísindaleg rannsóknastofnun við Háskóla Íslands og Landspítala-háskólasjúkrahús, sem hefur samstarf við háskóla, deildir spítalans og aðrar stofnanir um rannsóknir á sviði næringarfræði. Stofan er vettvangur vísindarannsókna og þróunarstarfs á sviði næringarfræði.“

Þá segir m.a. í 2. gr. um markmiðin að: „Markmið Rannsóknastofu í næringarfræði er að vera miðstöð rannsókna á sviði næringarfræði sem heilbrigðisvísindagreinar, sem tengir heilbrigðis- og raunvísindi við þekkingu á menningu og félagslegum aðstæðum, iðnaði og markaði.

7.4 Europlan University Associates – EUA – Úttekt og heimsókn í raunvísindadeild

Deildarforseti skýrði frá komu sérfræðingahóps frá EUA sem hefur verið í heimsókn hjá H.Í. og deildum hans til að leggja mat á Háskólann. Niðurstöður sérfræðingahópsins verði kynntar nú í júní en fram hafa komið hjá sérfræðingahópnum að Háskóli Íslands sé vel stjórnað en að hann fái of lágar fjárveitingar.

8. Samkomulag rektors við Jón Ragnar Stefánsson

Dreift var bréfi rektors til deildarforseta, dags. 27. apríl 2005 varðandi samkomulag rektors og Jóns Ragnars Stefánssonar. Þá var samkomulagi rektors Háskóla Íslands og Jóns Ragnars Stefánssonar, dags. 20. apríl 2005, einnig dreift.

Bréfið og samkomulagið var rætt. Deildarráð lýsti áhyggjum sínum af framkvæmd einstakra atriða samkomulagsins.

9. Þróunaráætlun deildar – Framhaldsumræða frá síðasta fundi

Þróunaráætlun deildar verður rædd í samhengi við væntanlega 5 ára áætlun nýs rektors.

10. Önnur mál

Engin önnur mál.