1. Fundargerð síðasta fundar

Samþykkt án athugasemda.

2. Próf á ensku fyrir erlenda nemendur

Deildarráð áréttar að erlendir nemendur á 1. ári eigi rétt á að fá prófverkefni á ensku.

3. Umsókn um nýtt kennarastarf (100%) í ferðamálafræðum

• Lögð fram greinargerð skorarformanns, dags. 18.03.2005 um nýtt starf í ferðamálafræðum.
• Lögð fram greinargerð fyrrverandi skorarformanns, dags. 23. nóvember 2003 ásamt bréfi sama dags.

Deildarforseti skýrði frá því að fjármálanefnd deildar hefði farið yfir málið og legði til að óska eftir því að starfið yrði auglýst.

Skorarformaður gerði grein fyrir málinu og þörf fyrir að ráða í starfið. Gert væri ráð fyrir því í fjárhagsáætlun deildar á þessu ári að ráðið verði í starfið.

Eftirfarandi tillaga fjármálanefndar deildar var samþykkt af deildarráði:

Með hliðsjón af framangreindum greinargerðum leggur fjármálanefnd deildar til að heimilað verði að auglýsa starf kennara í ferðamálafræðum. Með þessu starfi verður jarð- og landfræðiskor samt innan við viðmiðunarmörk um hlutfall fastra kennara miðað við kennslumagn í kössum.

Þá er gert ráð fyrir því skv. fjárhagsáætlun að ráðið sé í starfið á þessu ári. Deildarráð samþykkti ofangreinda tillögu og að óska eftir því við fjármálanefnd háskólaráðs að heimilað verði að auglýsa kennarastarf (100%) í ferðamálafræðum við jarð- og landfræðiskor.

4. Umsókn um nýtt kennarastarf í næringarfræði

Fjármálanefnd deildar hefur fjallað um málið en á síðasta fundi nefndarinnar lá fyrir greinargerð Ingu Þórsdóttur prófessors um málið. Farið var yfir helstu rök fyrir þörfinni til að ráða í starfið.

Fjármálanefnd deildar mælti með að ráðið yrði í starfið en fól Ingu að endurskoða greinargerðina til að leggja fyrir deildarráð.
Skorarformaður gerði grein fyrir málinu.

Deildarráð samþykkti að óska eftir því við fjármálanefnd háskólaráðs að heimilað verði að auglýsa kennarastarf (100%) í næringarfræði við matvæla- og næringarfræðiskor.

5. Tillaga Jóns Kr. Arasonar varðandi styttingu framhaldsskólans

Eftirfarandi tillaga Jóns Kr. Arasonar formanns stærðfræðiskorar lá fyrir fundinum. Tillaga að ályktun um styttingu framhaldsskólans:

Raunvísindadeild lýsir yfir áhyggjum vegna áætlana um styttingu náms til stúdentsprófs. Deildin telur að verði þessum áætlunum hrint í framkvæmd óbreyttum þá verði undirbúningur nemenda fyrir nám við deildina mun lakari en nú er og það muni óhjákvæmilega leiða til þess að minnka verði námskröfur við deildina. Raunvísindadeild álítur það mikilvægt við endurskoðun náms í framhaldsskóla að tryggt sé að allir nemendur fái góðan grunn við hæfi í íslensku, ensku og stærðfræði. Jafnframt álítur deildin mikilvægt að nemendur hafi frelsi og möguleika á að undirbúa sig sérstaklega undir áframhaldandi nám í einstökum greinum. Kennsla í stærðfræði er sérstakt áhyggjuefni. Nám í stærðfræði fyrir 1. árs nema í raunvísinda- og verkfræðideildum miðar við að nemendur hafi tekið eitt námskeið í stærðfræði á hverju misseri í framhaldsskóla, samtals 24 einingar. Eftir fyrirhugaða styttingu framhaldsskólans verður ekki raunhæft að gera ráð fyrir meira námi í stærðfræði en 18 einingum. Þessa skerðingu verður að bæta nemendum upp þegar í háskóla er komið og þannig yrði minna svigrúm/tími til annarrar stærðfræðikennslu og stærðfræðiinnihald myndi því minnka á ýmsum námsbrautum.

Tillagan var rædd en ekki borin upp til formlegrar samþykktar í deildarráði. Samþykkt að deildarforseti og formaður stærðfræðiskorar skrifi blaðagrein vegna styttingar framhaldsskólans og hvernig undirbúningur verður í framtíðinni með hliðsjón af styttingunni.

6. Mál til kynningar.

6.1 Úrslit atkvæðagreiðslu um fulltrúa á háskólafund

Dreift var plaggi með niðurstöðum atkvæðagreiðslu á deildarfundi um fulltrúa deildar á háskólafund.

6.2 Tilnefning fulltrúa í námsstjórn fyrir umhverfis- og auðlindafræði

6.3 Tilnefning í ritnefnd Aldarsögu Háskóla Íslands

Deildarforseti hefur tilnefnt Einar H. Guðmundsson sem fulltrúa deildar í ritnefndina en rektor mun velja fulltrúa raunvísindadeildar eða verkfræðideildar í ritnefndina.

6.4 Heimild fjármálanefndar háskólaráðs til að ráða lektor í líffræði

Snæbjörn Pálsson hefur verið ráðinn lektor í líffræði til eins árs frá 1. janúar sl.

6.5 Stjórnsýslulög

Deildarforseti dreifði stjórnsýslulögum og fyrirlestri Páls Hreinssonar prófessor í lagadeild sem hann flutti á fundi með stjórnendum við Háskóla Íslands á fundi í Þorlákshöfn nú á dögunum.

7 Önnur mál

Engin önnur mál.