1. Erlendir stúdentar

Björg Eysteinsdóttir frá Alþjóðaskrifstofu sat fundinn undir þessum lið. Rætt var um stúdentaskipti, helstu vankanta á núverandi fyrirkomulagi og hvernig best væri að haga stúdentaskiptunum.

2. Fundargerð síðasta fundar

Samþykkt án athugasemda.

3. Til kynningar

3.1 Rannsóknardagar

Kynnt var erindi stúdenta um að í nóvember haldinn verði rannsóknardagur þar sem nemendur og kennarar kynna rannsóknir sínar og verkefni. Kynningarnar væru opnar almenningi og fyrirtækjum. Málið fékk góðan hljómgrunn og var vísað til meðferðar í skorum.

3.2 Nordic Research Board

Kynntar voru fyrirætlanir um norrænt rannsóknasvæði og skipun norræns rannsóknaráðs.

3.3 Fjármálastaðan

Nýju yfirliti yfir fjárhagsstöðu verkfræðideildar var dreift á fundinum. Staða skora er nokkuð misjöfn en í heild stefnir í að deildin skili rekstrarafgangi.

3.4 Þróun Oracle kerfisins

Mikil óánægja hefur verið með Oracle fjárhagskerfið og upplýsingarnar sem hægt er að taka úr því. Deildarforseti situr í nefnd sem á að greina þarfir notenda kerfisins í Háskólanum. Rætt var hvaða aðgerðir væri nauðsynlegast að gera aðgengilegar skorarformönnum.

4. Fastanefndir deildar

Deildarforseti óskaði eftir tilnefningu í allar þrjár fastanefndir deildarinnar. Samþykkt var óbreytt skipan.

5. Umsögn um prófafyrirkomulag

Tillaga deildarforseta að umsögn var rædd í þaula á fundinum og samþykkt með nokkrum breytingum.

6. Meistaranámsnefndir

Lagt var til að skipaðir yrðu fulltrúar deildar í meistaraprófi eftirfarandi nemenda:

Elías H. Bjarnason, v&i

Snorri Þ. Ingvarsson, verkefnisstjóri hjá Iðntæknistofnun. Leiðbeinendur eru Sveinn Ólafsson, sérfræðingur við Raunvísindastofnun, og Fjóla Jónsdóttir, dósent.

Þóra Jónsdóttir, tölvunarfræðiskor

Tómas Philip Rúnarsson, sérfræðingur hjá Raunvísindastofnun. Leiðbeinandi er Ebba Þóra Hvannberg, dósent, og aðrir í nefndinni eru Sven Þ. Sigurðsson, prófessor, og Helgi Sigurðsson, sérfræðingur við Krabbameinsstöð LSH.

Sigrún Dóra Sævinsdóttir, tölvunarfræðiskor

Jón Atli Benediktsson, prófessor. Leiðbeinendur eru Tómas Philip Rúnarsson, sérfræðingur, og Sven Þ. Sigurðsson, prófessor.

Þessar tillögur voru samþykktar samhljóða.

7. Umsókn um doktorsnám í tölvunarfræði

Vísindanefnd mælir með að samþykkt verði umsókn Elenu Lossieveskaju um doktorsnám í tölvunarfræði. Lögð voru fram gögn um málið en erindið verður afgreitt á næsta deildarráðsfundi.

8. Aðjúnktar í tölvunarfræðiskor

Tölvunarfræðiskor óskar eftir að Tómas Philip Rúnarsson verði framráðinn aðjúnkt við skorina frá 1. mars sl. til tveggja ára og Kristján Þór Finnsson og Ágúst Guðmundsson verði framráðnir til eins árs frá 1. júlí sl. Þetta var samþykkt samhljóða.

9. Nýtt starf við v&i

Eftirfarandi texta að auglýsingu var dreift á fundinu:

Við véla- og iðnaðarverkfræðiskor verkfræðideildar Háskóla Íslands er laust til umsóknar starf dósents í iðnaðarverkfræði. Meginstarfssvið yrði á sviði framleiðslu, hagkvæmni og hagnýtingar bestunar í rekstri fyrirtækja.

Véla- og iðnaðarverkfræðiskor hefur markað þá stefnu að rannsóknir og kennsla við skorina standist samanburð við það besta sem völ er á á alþjóðlegum vettvangi. Dósentinn þarf því að geta stundað og skipulagt öflugt kennslu- og rannsóknarstarf fyrir meistara- og doktorsnám við skorina.

Ráðið verður til þriggja ára með möguleika á framlengingu. Boðið er upp á áhugavert starfsumhverfi hjá vísindalegri rannsóknar- og fræðslustofnun sem veitir nemendum sínum menntun til þess að sinna sjálfstætt vísindalegum verkefnum og störfum í þjóðfélaginu.

Eftir nokkrar umræður var auglýsingin samþykkt einróma.

10. Önnur mál

10.1 Húsnæðismál deildar

Lögð var fram samantekt Jónasar Elíassonar á notkun húsnæðis í VR-II. Jónas bar upp tillögu um að verkleg kennsla, sem nú fer fram í VR-II, flyttist í VR-III og rýmið í þess stað tekið undir almenna kennslu. Málið verður skoðað.

10.2 Greining raforkukerfa

Egypskur gestakennari kennir þetta námskeið á fimm vikum í september og október. Próf í námskeiðinu þarf að halda 24. eða 30. október. Leitað var samþykkis deildarráðs við því að halda próf utan próftímabils og var það heimilað einróma.